«Համալսարանական» թատրոն-ստուդիան հիմնադրվել է 2005 թ-ին և գործել «ԵՊՀ շրջանավարտների միավորում» ՀԿ-ի կազմում: Թատրոն-ստուդիայի բացումը տեղի ունեցավ նույն թվականի ապրիլի 28-ին ԵՊՀ կենտրոնական մասնաշենքի 6-րդ հարկի դահլիճում` Վ. Սարոյանի «Հե~յ, ո՞վ կա»… պատասխանում է «Ջիմ Դենդին» ներկայացման առաջնահաբեմը (պրեմիերայով): ԵՊՀ Շառլ Ազնավուրի անվան մշակույթի կենտրոնի ստեղծման օրից թատրոն-ստուդիան հանդես եկավ Կենտրոնի կազմում: 2006 թ-ի հոկտեմբերին «Համալսարանական» թատրոն-ստուդիան մասնակցեց «ՀայՖեստ» միջազգային թատերական փառատոնին իր երկու ներկայացումներով, ընդ որում` Վ. Սարոյան «Հե~յ, ո՞վ կա»… պատասխանում է «Ջիմ Դենդին» ներկայացումը երիտասարդ դերակատարները խաղացին անգլերեն լեզվով: Այս փառատոնի մասնակցությունից հետո Եվրամիության արվեստների լիգայի` (ELIA) նախագահն առաջարկել է, որ «Համալսարանական» թատրոն-ստուդիան նույնպես ընդգրկվի լիգայի կազմում: Ի դեպ, Հայաստանից լիգայում ներկայացված է միայն Երևանի պետական համալսարանը: Թատրոնի նպատակն է համախմբել ԵՊՀ ակտիվ և շնորհալի ուսանողներին ու շրջանավարտներին, աշխուժացնել համալսարանի մշակութային կյանքը:

     Տարբեր տարիների ներկայացումները.

• 2005թ. Ապրիլի 28- Վ.Սարոյանի ««Հե~յ, ո՞վ կա…» պատասխանում է «Ջիմ Դենդին»» ներկայացում (Վ. Սարոյանի երկու համանուն պիեսների զուգորդում է)
• 2005թ. դեկտեմբերի 27- Դ. Դեմիրճյանի «Քաջ Նազար» ներկայացում
• 2007թ. հոկտեմբերի 11- «Ես իմ անուշ Հայաստանի…» ներկայացում` նվիրված Չարենցի 110-ամյակին ,(պիեսի հեղինակ Կ. Դավթյան) ներկայացումը մասնակցել է «Հայ Ֆեստ» միջազգային թատերական փառատոնին
• 2008թ. հոկտեմբերի 8 - «Ցուցակ» ներկայացում` Աղասի Այվազյանի պատմվածքների հիման վրա (պիեսի համահեղինակներ Գրետա Այվազյան և Կարինե Դավթյան) ,
• 2010թ. մայիսի 3 -«Ընկեր Բ. Փանջունի» ներկայացում` Երվանդ Օտյանի համանուն ստեղծագործության վրա, թատրոն-ստուդիայի հիմնադրման 5-ամյակի կապակցությամբ (պիեսի համահեղինակներ Կարինե Դավթյան և Արթուր Գեղամյան )
• 2011թ. հունիսի 17 - «Կարոտ» ներկայացում` Նոդար Դումբաձեի համանուն պատմվածքի հիման վրա
• 2011թ. նոյեմբերի 14-ին «Եվ Այր մի` Մաշտոց անուն» ներկայացում` Մեսրոպ Մաշտոցի ծննդյան 1650-ամյակի կապակցությամբ, որը թատրոն-ստուդիային պատվիրել էր Մ. Մաշտոցի 1650-ամյակը նշող հոբելյանական հանձնաժողովը:
• 2012թ. դեկտեմբերի 27- «Գրինչը գողանում է Ամանորը» տոնական համերգ-ներկայացում
• 2013թ. դեկտեմբերի 26 - «Ամանորյա հրաշքներ» տոնական համերգ-ներկայացում
• 2014թ. ապրիլի 16- Գրիգոր Նարեկացու «Մատյան ողբերգության» պոեմի հիման վրա մոնոներկայացում` ՀՀ վաստակավոր արտիստ Սամվել Բաղինյանի մասնակցությամբ
• 2014թ. հունիսի 17 – Վ. Շեքսպիրի «Ռոմեո և Ջուլիետ» երաժշտական ներկայացում
• 2014թ. նոյեմբերի 2 – բոստոնահայ գրող Ջոյս Վան Դայկի «Աքսորվածները» երազ-պիեսի անգլերեն լեզվով բեմադրված ընթերցանություն
• 2018թ. հունիսի 7-ին «Հայկական էսքիզներ» ներկայացումը` բեմադրված Վ. Պետրոսյանի համանուն ստեղծագործության հիման վրա, (պիեսեի համահեղինակներ Կարինե Դավթյան և Անի Միքայելյան)
• 2019թ. սեպտեմբերի 26-ին «Կարինե» օպերետ (Տիգրան Չուխաջյան) Գ. Սունդուկյանի անվան ազգային ակադեմիական թատրոնում,

     «Համալսարանական» թատրոն-ստուդիան արդեն հասցրել է հյուրախաղերով հանդես գալ Արցախում Վ. Սարոյանի «Հե~յ, ո՞վ կա»… պատասխանում է «Ջիմ Դենդին», Աղասի Այվազյանի «Ցուցակը», Պ. Սևակի «Եվ այր մի` Մաշտոց անուն» ներկայացումներով` ներկայացնելով այն Ստեփանակերտի պետական դրամատիկական թատրոնում և Մշակույթի պալատում, իսկ «Ռոմեո և Ջուլիետ» -ը` Ս. Սարգսյանի անվան համազգային թատրոնում և Հ. Ղափլանյանի անվան դրամատիկական թատրոնում: «Արթֆեստ» միջազգային փառատոնին վերջինս արժանացել է «Հատուկ մրցանակ»-ի: 2019թ. «Հայկական էսքիզներ» ներկայացումը ցուցադրվել է «Բոհեմ» թատրոնում «ՀայՖեստ» միջազգային թատերական փառատոնի շրջանակներում: Թատրոն-ստուդիայի գեղ. ղեկ. Կարինե Դավթյանը համագործակցում է նկարչուհի Աննա Հարությունյանի և հայտնի կոմպոզիտորների հետ, ինչպիսիք են Արամ և Դավիթ Սաթյանները, Արթուր Հակոբյանը, Մարտին Վարդազարյանը:

     Թատրոն-ստուդիա ընդունվելու համար ուսանողները մասնակցում են հատուկ մրցույթ-ստուգատեսի, որի ժամանակ ընտրվում են թատերական ձիրք ունեցող ուսանողները: Թատրոն-ստուդիայի պարապունքներն անց են կացվում շաբաթական երկու անգամ` երկու ժամ տևողությամբ: Թատրոն-ստուդիայի ընդունելության համար անցկացվող մրցույթները տեղի են ունենում յուրաքանչյուր կիսամյակի սկզբում:

     «Համալսարանական» թատրոն-ստուդիայի գեղ. ղեկավարն ու բեմադրիչն է ռեժիսոր Կարինե Դավթյանը: