Անգլիական բանասիրության ամբիոնը Երևանի պետական համալսարանում դեռևս 30-ական թվականներին հիմնադրված և հանրապետությունում տարածում գտած երեք օտար լեզուները (անգլերեն, գերմաներեն, ֆրանսերեն) միավորող ռոմանագերմանական բանասիրության ամբիոնի արժանի ժառանգորդն է:

1991 թ. հայ բանասիրության ֆակուլտետի կազմում գործող օտար լեզուների մասնագիտական բաժինների հիմքի վրա ստեղծված ռոմանագերմանական բանասիրության ֆակուլտետով (ներկայում՝ եվրոպական լեզուների և հաղորդակցության ֆակուլտետ) ձևավորվեց անգլիական բանասիրության ամբիոնի գործունեությունը որպես այդպիսին: Ժառանգելով իր վաստակաշատ ու բազմահմուտ նախորդների՝ ակադեմիկոսներ Գ. Ջահուկյանի, Էդ. Աթայանի, բ.գ.թ. պրոֆեսորներ Հ. Թոքմաջյանի, Ե. Մխիթարյանի գիտամանկավարժական հարուստ փորձը՝ նորաստեղծ ամբիոնի վարիչի պարտականությունները ստանձնեց բ.գ.թ. (բ.գ.դ.՝ 1994 թ.-ից), դոցենտ (պրոֆեսոր՝ 2000 թ.-ից) Ս. Ք. Գասպարյանը:

Շուրջ 60 մասնագետներ ընդգրկող անգլիական բանասիրության ամբիոնը, որն այսօր իրականացնում է բազմաբնույթ ուսումնամեթոդական և գիտական գործունեություն, ապահովում է գործնական անգլերենի ուսուցում՝ որպես հիմնական և երկրորդ մասնագիտական լեզու, ինչպես նաև տեսական գիտելիքներ հաղորդում անգլիական բանասիրության տարբեր գիտակարգերի ոլորտում, ծանոթացնում երկրագիտական և լեզվամշակութային արժեք ունեցող փաստերի:

Ստանձնելով հանրապետության առաջատար մասնագիտական ամբիոնի պատասխանատու դերը՝ անգլիական բանասիրության ամբիոնն այսօր լծվել է բարձրորակ մասնագետների պատրաստման ու որակավորման ծանր, բայց և արժանապատիվ գործին՝ ամբիոնի գիտական աշխատանքը զարգացնելով տարբեր ուղղություններով, մասնավորապես՝ գործառական լեզվաբանություն, գեղարվեստական տեքստի լեզվի և ոճի հարցեր, տեքստի մեկնաբանություն, ակադեմիական լեզվի կիրառության խնդիրներ, համացանցային լեզվի կիրառության յուրահատկությունները և այլն:

Գիտական և ուսումնամեթոդական աշխատանքների ոլորտում ուշադրության է արժանի այն փաստը, որ ամբիոնում մշտապես լույս են տեսնում մենագրություններ, բուհական դասագրքեր, ուսումնամեթոդական ձեռնարկներ և բառարաններ, գիտական հոդվածներ, որոնք նվիրված են ժամանակակից լեզվաբանության տարաբնույթ արդիական խնդիրների քննությանն ու լուսաբանմանը: Ամբիոնում իրականացվում են նաև թարգմանական աշխատանքներ, մեծ ծավալի խմբագրական և գրախոսական աշխատանք: Բարի ավանդույթ է դարձել ամբիոնի անդամների ակտիվ մասնակցությունը գիտաժողավների (ինչպես հանրապետական, այնպես էլ միջազգային), նաև դրանց գումարումը, որը լավ հնարավորություն է ոչ միայն կատարված աշխատանքն ամփոփելու, այլև ամբիոնի միջազգային կապերն ընդլայնելու առումով: Ամբիոնն այսօր սերտ համագործակցություն է իրականացնում Մոսկվայի Մ. Լոմոնոսովի անվան պետական, Կրակովի Յագելլոնյան, Վենետիկի Կա’Ֆոսկարի, Բերգամոյի և այլ եվրոպական համալսարանների մասնագետների հետ: Կազմակերպվում են փոխայցելություններ, գիտակրթական սեմինարներ, միջազգային գիտական նստաշրջաններ, որոնց շրջանակներում լայն հնարավորություն է ստեղծվում քննարկելու ինչպես լեզվաբանական, այնպես էլ կրթության արդյունավետության բարձրացմանն ուղղված տարաբնույթ խնդիրներ, իրականացնել գիտակրթական փորձի փոխանակում:

2016 թ.-ից ի վեր ERAZMUS+ ծրագրի շրջանակներում ամբիոնի բակալավրական և մագիստրոսական ծրագրերում մասնագիտացող մեծ թվով ուսանողներ հնարավորություն են ունեցել մինչև հինգ ամիս տևողությամբ իրենց ուսումնառությունը շարունակելու Վենետիկի Կա’Ֆոսկարի և տարբեր այլ եվրոպական համալսարաններում՝ գրանցելով բարձր արդյունքներ:

Վերջին տասնամյակում բարի ավանդույթ է դարձել ամբիոնի մասնագետների և ուսանողների գործուն մասնակցությունը արտասահմանյան տարբեր երկրներից հրավիրվող մասնագետների դասախոսություններին, սեմինարներին ու քննարկումներին, որը լայն հնարավորություն է ստեղծում ինչպես գիտագործնական փորձի փոխանակման, այնպես էլ միջազգային համագործակցության ընդլայնման համար:

2016 թ.-ից ամբիոնում բացվել է «Կիրառական լեզվաբանություն» միջգիտակարգային մագիստրոսական ծրագիրը, որն ըստ էության աննախադեպ է ՀՀ բուհական համակարգում և նպատակադրված է պատրաստելու միջազգային ստանդարտներով աշխատելու կայուն ունակությունների և հմտությունների տիրապետող մասնագետներ, որոնք այսօր մեծ պահանջարկ ունեն հայ ակադեմիական ոլորտի մասնագետներին միջազգային աշխատաշուկային համապատասխան լեզվական հմտություններ սովորեցնելու բնագավառում:

Ամբիոնի կրթական ձեռքբերումներից է նաև բակալավրական ուսուցման շրջանակներում «Օտար լեզուներ (անգլերեն և որևէ այլ եվրոպական լեզու) և հաղորդակցություն» նոր մասնագիտության ծրագրի մշակումը, որի հիմքում երկու օտար լեզուների՝ մասնագիտական ուսուցման նպատակն է, որը համահունչ է հանրապետության և միջազգային աշխատաշուկայի պահանջներին:

Ուսուցման եռաստիճան համակարգի ներդրման պայմաններում ամբիոնը վերամշակել և ստեղծել է նոր ուսումնական ծրագրեր, որոնք նպատակաուղղված են համակողմանի մասնագիտական կրթություն ապահովելու բակալավրիատի և մագիստրատուրայի փուլերում՝ համապատասխանաբար: Ուսուցման ծրագրերն ամբիոնում իրականացվում են ըստ կրեդիտային համակարգի պահանջների:

Անգլիական բանասիրության ամբիոնում մասնագիտացած շատ շրջանավարտներ այսօր բազմաբեղուն գործունեություն են իրականացնում հանրապետության տարբեր ձեռնարկություններում, նախարարություններում, հանրակրթական և բարձրագույն դպրոցներում, արտերկրի տարբեր համալսարաններում և այլուր:
Ամբիոնը արդյունավետ համագործակցում է նաև Եվրոպական ֆեդերացիայի անդամ Անգլերենի ուսումնասիրության հայկական ասոցիացիայի հետ՝ իր նպաստը բերելով ՀՀ-ում կրթության և գիտության զարգացման գործին, մասնավորապես՝ անգլերենի ոլորտում: Մեծ է նաև ամբիոնի մասնակցությունը ասոցիացիայի ակադեմիական պարբերականի՝ Armenian Folia Anglistika միջազգային հանդեսի հրատարակման գործում:

Անգլալեզու հակահայկական քարոզչական դիսկուրսի հետազոտությունների լաբորատորիա
«Անգլալեզու հակահայկական քարոզչական դիսկուրսի հետազոտությունների լաբորատորիա» ծրագիրը (գիտական ղեկավար՝ պրոֆ. Ս. Գասպարյան) սկզբնավորվել է 2015 թվականից ԵՊՀ Եվրոպական լեզուների և հաղորդակցության ֆակուլտետի անգլիական բանասիրության ամբիոնի բազայի վրա ՀՀ պետական բյուջեի ֆինանսավորմամբ:

Ծրագիրը նպատակ ունի ուսումնասիրելու հակահայկական քարոզչական դիսկուրսը և ընդհանրապես Հայոց ցեղասպանությանն ու Հայկական հարցին առնչվող տարաբնույթ անգլալեզու նյութեր, լայն առումով, լեզվաճանաչողաբանության դիրքերից, բացահայտելու տարբեր լեզվական մարտավարությունների կիրառությունը՝ որպես քաղաքական քարոզչամիջոց՝ հասարակական կարծիք ձևավորելու և ընթերցողի վերաբերմունքը ուղղորդելու մեխանիզմ:

2014 թ. գիտական թեմայի շրջանակներում հրատարակված “The Armenian Genocide: A Linguocognitive Perspective” մենագրության մեջ հեղինակը՝ ՀՀ ԳԱԱ թղթակից անդամ, պրոֆեսոր Ս. Ք. Գասպարյանը, ելնելով լեզվաբանության մեջ վաղուց արդեն հաստատված լեզու-մտածողություն փոխադարձ կապի դրույթից, առաջին անգամ ուսումնասիրեց Հայոց ցեղասպանության խնդիրն արծարծող աշխատություններ՝ վեր հանելով ընթերցողի գիտակցության վրա որոշակի դիտավորությամբ ներազդելու լեզվական մեխանիզմները և բացահայտեց մի շարք օտարերկրյա հեղինակների՝ պատմությունը աղավաղելու և Հայոց ցեղասպանության անհերքելի փաստը հերքելու թուրքամետ մտադրությունները: Այս աշխատանքը, միանգամայն նոր հուն բացելով ցեղասպանագիտական ուսումնասիրությունների բնագավառում, ճանապարհ հարթեց ցեղասպանության խնդիրների հետագա լեզվաճանաչողական քննության համար:

2016 թ. հետազոտական խմբի (գիտական ղեկավար՝ պրոֆ. Ս. Ք. Գասպարյան, հետազոտական խումբ՝ Շ. Պարոնյան, Ա. Չուբարյան, Գ. Մուրադյան) ջանքերով լույս տեսավ “Raphael Lemkin’s Draft Convention on Genocide and the 1948 UN Convention” մենագրական ուսումնասիրությունը, որտեղ ցեղասպանության կոնվենցիայի լեմկինյան նախագծի և ՄԱԿ-ի 1948 թ. ընդունած կոնվենցիայի զուգադիր տեքստաբանական քննությամբ վեր հանվեցին այդ երկու փաստաթղթերի տարբերությունները՝ ցեղասպանությունները կանխարգելելու համար կոնկրետ քայլեր ձեռնարկելու քաղաքական, սոցիալական, մշակութային և իրավական խնդիրների մեկնաբանման առումով: Ուսումնասիրությունը ցույց է տալիս, որ ՄԱԿ-ի Կոնվենցիայի տեքստում կատարած բառային, ձևաբանական, շարահյուսական փոփոխությունների արդյունքում ՄԱԿ-ի Կոնվենցիայի ենթատեքստում նվազել են ցեղասպանության հանդեպ անհանդուրժող վերաբերմունքի դրսևորման և մարդկության դեմ իրականացվող այդ զազրելի ոճիրն իրականացնողներին խստագույնս պատժելու վճռականությունը:

Լաբորատորիայի հետազոտական աշխատանքի ներկա փուլում գիտական խումբը ձեռնարկել է Թուրքիայի քրեական օրենսգրքի 301 հոդվածի լեզվական մտաշահարկման մեխանիզմների քննությունը, որի արդյունքները պատրաստ են հրապարակման՝ մենագրությամբ:

Բրիտանական գրականության և լեզվամշակույթի ուսումնասիրության լաբորատորիա

Անգլիական բանասիրության ամբիոնի բազայի վրա 2017 թվականից գործում է «Բրիտանական գրականության և լեզվամշակույթի ուսումնասիրության լաբորատորիան» ՀՀ պետական բյուջեի բազային ֆինանսավորման շրջանակներում, որն իրականացնում է բրիտանական լեզուների, գրականության և մշակույթի համակողմանի հետազոտություններ` ընդգրկելով նաև ներկայումս բրիտանական մշակույթի առավել դինամիկ և յուրօրինակ ճյուղերից մեկը՝ շոտլանդական գրականության և մշակույթի ուսումնասիրությունը: Լաբորատորիան անդամակցում է Շոտլանդական գրական ուսումնասիրությունների ասոցիացիային, իսկ 2018 թվականից՝ Շոտլանդական գրականության ուսումնասիրության միջազգային ասոցիացիային:

2017 - 2018 թթ. ընթացքում հետազոտական խումբը (գիտ. ղեկավար՝ բ.գ.թ., դոցենտ Մարիանա Սարգսյան, գիտաշխատողներ՝ բ.գ.թ., դոցենտ Նաիրա Գասպարյան և բ.գ.թ., ասիստենտ Արփինե Մադոյան) տեղական և միջազգային առաջատար պարբերականներում հրատարակել է 8 գիտական հոդված, հետազոտության արդյունքները ներկայացրել նաև 2 միջազգային գիտաժողովներում: Լաբորատորիան համագործակցում է նաև Էդինբուրգի համալսարանի լեզվի, գրականության և մշակույթի ամբիոնի հետազոտողների հետ ԵՊՀ-ի և Էդինբուրգի համալսարանի միջև ստորագրված համագործակցության մասին փոխըմբռնման հուշագրի շրջանակներում: 2019 թ.-ից հետազոտական ծրագրով նպատակ է դրված մեկնարկել ուսումնասիրություններ՝ հայ-շոտլանդական առնչությունների բացահայտման ուղղությամբ:

1957 թ.բանասիրության ֆակուլտետում գործող օտար լեզուների ամբիոնը բաժանվում է երկու ամբիոնների՝ ռոմանագերմանական բանասիրության և օտար լեզուների: Վերջինս համարվում էր համահամալսարանական, քանի որ այն օտար լեզուների ուսուցում էր իրականացնում տարբեր ֆակուլտետներում:

Օտար լեզուների ամբիոնը ղեկավարել են վաստակաշատ գիտնականներ պրոֆեսոր Ս. Մանուկյանը, բ.գ.թ., դոցենտ Դ.Սաքանյանը, մ.գ.թ., դոցենտ Մ. Հարությունյանը, մ.գ.թ., դոցենտ Կ.Կարապետյանը, որոնց ջանքերի շնորհիվ ամբիոնում ձևավորվել են լավագույն ավանդույթներ:

1991թ. բանասիրության ֆակուլտետից առանձնացան օտար լեզուների բաժինները, որոնց հիման վրա էլ ձևավորվեց ռոմանագերմանական բանասիրության ֆակուլտետը որպես համալսարանի ուսումնագիտական ինքնուրույն ստորաբաժանում: Օտար լեզուների ամբիոնն ընդգրկվեց այդ ֆակուլտետի մեջ, վերանվանվեց անգլերեն լեզվի թիվ 1 ամբիոն և 2001-ից ամբիոնի վարիչ դարձավ երիտասարդ մասնագետ բ.գ.թ., դոցենտ Մ.Ապրեսյանը:

Ամբիոնի կատարած աշխատանքը լի է նորամուծություններով և հաջողություններով: Այսօր ամբիոնն ակտիվորեն իրականացնում է լայնածավալ ու բազմամակարդակ կրթական ծրագրեր տարբեր ֆակուլտետներում (ինֆորմատիկայի և կիրառական մաթեմատիկայի, ֆիզիկայի, ռադիոֆիզիկայի, քիմիայի, կենսաբանության, երկրաբանության և աշխարհագրության, փիլիսոփայության և հոգեբանության, սոցիոլոգիայի, պատմության, աստվածաբանության և իրավագիտության):Դրանք ուղղորդված են անգլերենի ուսուցումը ծառայեցնելու մասնագիտական նպատակներին: Ամբիոնի աշխատանքային և կրթական գործունեության կարևոր մասն է կազ-մում գիտամեթոդական աշխատանքը՝ պայմանավորված գիտատեխնիկական առաջընթացի, միջազգային և շուկայական հարաբերությունների զարգացման և գլոբալացման մարտահրավերներով: Այս առումով գրագետ, մասնագիտական անգլերենին տիրապետող մասնագետների պատրաստումն անգլերեն լեզվի թիվ 1 ամբիոնի կրթական կարևորագույն նպատակներից մեկն է:

Ամբիոնն իր կրթական լայնածավալ գործունեությունն իրականացնում է՝ ապավինելով իր որակյալ դասախոսական աշխատակազմին (ավելի քան 50 դասախոս) և ամբիոնի վարիչ բ.գ.թ., դոցենտ Մ.Ապրեսյանի ղեկավարությանը, կազմակերպվա-ծությանն ու նվիրվածությանը նորացող կրթական գործընթացին: Ամբիոնն իր առջև նպատակ է դրել հետևողականորեն արդիականացնել անգլերենի դասավանդման մեթոդները (անգլերենը մասնագիտական նպատակների համար ESP - English for Special Purposes), զարգացնել կիրառական լեզվաբանությունը՝ ելնելով ժամանակի պահանջներից:

Ամբիոնի կարևոր ձեռքբերումներից է «FLSP (օտար լեզուն հատուկ նպատակների համար)» միջազգային գիտական ամսագրի հիմնադրումը (գլխավոր խմբագիր` Մ. Ապրեսյան), որտեղ հրատարակվող հոդվածները լուսաբանում են անգլերեն լեզվով մասնագիտության ուսուցման միջազգային փորձն ու ձեռքբերումները, դասավանդման մեթոդիկան՝ ըստ սովորողների փոփոխվող կարիքների ու պահանջների:

Անգլերեն լեզվի թիվ 1 ամբիոնն արտերկրի համալսարանների մասնագետների մասնակցությամբ (Կլակամասի համալսարան, ԱՄՆ) մշակել է անգլերենի ուսուցման հիմնադրույթներն ըստ նոր եռաստիճան կրթական համակարգի առնձնահատկությունների: Ոչ լեզվական ֆակուլտետներում մագիստրոսական ուսուցումն անհրաժեշտ մակարդակով իրականացնելու համար ամբիոնը մշակել է անգլերենի դասավանդման արդիական ծրագիր:

Ամբիոնը համագործակցում է արտերկրի համալսարանների հետ (ԱՄՆ, Մեծ Բրիտանիա)՝ նպատակադրվելով ուսումնասիրել և օգտագործել նրանց փորձն ու գիտամեթոդական ռեսուրսները: Հրավիրված մասնագետները հանդես են գալիս դասախոսություններով, անցկացնում սեմինարներ, որոնք ուղեկցվում են բուռն քննարկումներով: Այս ամենի արդյունքում հնարավոր է դառնում նորացնել ուսումնական պրոցեսը, մշակել անգլերենի դասավանդման նոր միջազգային չափանիշներին համապատասխան մեթոդներ՝ պահպանելով դասավանդման ավանդույթները:

Ամբիոնի դասախոսները հեղինակ են մի շարք դասագրքերի, ուսումնական ձեռնարկների և տեխնիկական բառարանների, որոնք նախատեսված են բնագիտական ու ճշգրիտ, նաև հումանիտար ոլորտների համար:

Ամբիոնի կրթական քաղաքականությունը բխում է միջազգային և շուկայական հարաբերությունների զարգացման ներկա պայմաններում մասնագիտական տարբեր բնագավառների կողմից սովորողներին առաջադրվող պահանջներից:

Այսօր անգլերեն լեզվի թիվ 1 ամբիոնը Մ. Ապրեսյանի ջանքերի շնորհիվ դարձել է միջազգային թեստավորման կենտրոն, որը հաջողությամբ է անցկացնում TOEFL-ի (անգլերենի որպես օտար լեզվի թեստ) և ITEP (անգլերենի իմացության միջազգային թեստ) դասընթացներ և քննություններ անգլերեն լեզվի իմացության միջազգային վկայագրի տրամադրմամբ:

Այսօր ամբիոնը նաև կազմակերպում է մասնագիտական անգլերենի (Professional English) ուսուցումը ԵՊՀ-ի վարչական և տարբեր մասնագիտություններ ներկայացնող պրոֆեսորադասախոսական կազմի համար:

Ամբիոնի նպատակն է տարբեր բնագավառներում մասնագիտացող ապագա գիտնականներին տալ մասնագիտական անգլերենի հուսալի գիտելիքներ ու հմտություններ, որոնք կօգնեն նրանց ներկայացնելու ՀՀ գիտական պոտենցիալը միջազգային ասպարեզում:

Անգլերեն լեզվի թիվ 2 ամբիոնը հիմնադրվել է 1993 թվականին: Ամբիոնի ստեղծման օրից այն ղեկավարում է բանասիրական գիտությունների դոկտոր, պրոֆեսոր Ե. Երզնկյանը: Ամբիոնը Երևանի պետական համալսարանի համակարգում իր դեմքն ունեցող, հստակ կազմակերպված, կուռ օղակ է, որն իր գործունեությունը ծավալում է մի քանի ուղղություններով` ուսումնական, ուսումնամեթոդական, գիտական, հրատարակչական և դաստիարակչական:

Ամբիոնը ներկայացնում են ավելի քան քառասուն դասախոսներ, այդ թվում բանասիրական գիտությունների 1 դոկտոր, 13 թեկնածուներ, 1 պրոֆեսոր, 7 դոցենտներ, 6 ասիստենտներ, թարգմանիչներ, հմուտ դասախոսներ:

Ամբիոնն ապահովում է անգլերեն լեզվի դասավանդումը ԵՊՀ հետևյալ ֆակուլտետներում` հայ բանասիրության, ժուռնալիստիկայի, ռուս բանասիրության, արևելագիտության, միջազգային հարաբերությունների, տնտեսագիտության, ինչպես նաև մաթեմատիկայի և մեխանիկայի ֆակուլտետի ակտուարական և ֆինանսական մաթեմատիկայի բաժնում:

Դասավանդման հիմքում ընկած են անգլերենը որպես օտար/երկրորդ լեզու` (EFL/ESL) և անգլերենը մասնագիտական/ակադեմիական նպատակներով (ESP/EAP) դասընթացները, որոնք միանգամայն արդյունավետ և օտար լեզուների դասավանդման առավել նոր մոտեցումներ են ու լայն տարածում են գտել ողջ աշխարհում:

Ուսուցման եռաստիճան համակարգի անցնելու կապակցությամբ ամբիոնը վերամշակել և ստեղծել է բակալավրիատի և մագիստրատուրայի փուլերում անգլերենի համակողմանի ուսումնասիրությանը նպատակաուղղված նոր ուսումնական ծրագրեր, որոնք հիմք են ծառայել դասագրքերի, մեթոդական ձեռնարկների, քրեստոմատիաների, ուսումնական բառարանների, տեղեկատուների, մեթոդական ուղեցույցների և այլ օժանդակ նյութերի համար:

Օտար լեզվի ուսուցման գործնական նպատակը ծրագրի սահմաններում հաղորդակցական հիմք ստեղծելն է, այսինքն` ըստ իրադրությունների կարողանալ օտար լեզվով արտահայտվել (թե´ բանավոր և թե´ գրավոր) նախատեսված թեմաների շուրջ և լեզվական նյութի սահմաններում հասկանալ ընթերցած կամ ունկնդրած տեքստերը: Անգլերենի, ինչպես նաև մյուս օտար լեզուների դասավանդման գործընթացը նպատակաուղղված է սովորողների մոտ հաղորդակցական կարողություններ զարգացնելուն տարբեր բաղադրիչներով` ընդգրկելով խոսքային գործունեության բոլոր 4 հմտությունները` լսել/ունկնդրել, խոսել, կարդալ/ընթերցել, գրել:

Ուսումնական գործընթացում իրականացվում է անհատական մոտեցում, որը թույլ է տալիս բացահայտել յուրաքանչյուր ուսանողի գիտելիքների մակարդակը և օգնում է համեմատաբար թույլ ուսանողներին հաղթահարել դժվարությունները և լիարժեք ընդգրկվել ուսումնական գործընթացի մեջ: Դրան նպաստում է ամբիոնի դասախոսների կողմից շուրջ 10 տարի կիրառվող համակարգչային Edusoft - English Discoveries ծրագիրը, որն առավել արդյունավետ է դարձնում ուսուցման/ուսումնառության գործընթացը: Ծրագիրն ընդգրկում է 12 մակարդակներ` սկսնակից մինչև բարձր (basic-executive), ներառյալ գործարար անգլերենը (Business English):

Ամբիոնը, մշակելով Edusoft - English Discoveries համակարգչային ծրագրի հիման վրա մեթոդական և ուսումնական նյութեր, աշխատում է համակարգչային ծրագրի միջոցով անգլերենի ուսուցման հարցերի տեսական հիմնավորման ուղղությամբ:

Ամբիոնում գիտական աշխատանքներ են կատարվում իմաստաբանության և բառարանագրության, գործաբանության և տեքստի լեզվաբանության, ինչպես նաև լեզուների զուգադրական ուսումնասիրության և թարգմանության տեսության ոլորտներում: Լեզվի իմաստաբանական կարգերի ուսումնասիրության ոլորտում դիտարկվում են բառիմաստի և համատեքստի փոխազդեցության խնդիրներն ու առանձնահատկությունները, վերլուծվում է երկխոսությունը կառուցվածքային, իմաստային և գործաբանական տեսանկյուններից: Ուսումնասիրվում է լեզվի և մշակույթի փոխհարաբերությունը բառի իմաստային կառուցվածքի վերլուծության միջոցով, որի նպատակն է վեր հանել անգլերենի և հայերենի, անգլերենի և այլ օտար լեզուների անհամարժեք բառապաշարները:

Գիտական աշխատանքների ոլորտում ուշադրության է արժանի այն փաստը, որ ամբիոնում պարբերաբար իրականացվում են տարբեր գիտահետազոտական թեմաների ուսումնասիրություն, այդ թվում պետական ֆինանսավորմամբ: Ամբիոնի դասախոսները ամբիոնի վարիչ Ե. Երզնկյանի ղեկավարությամբ կատարել են հետևյալ ուսումնասիրությունները` «Հայերենից լեզվական տրանսֆերի (փոխանցման) առանձնահատկությունները անգլերեն լեզվի լսարանում» (2005 - 2007 թթ.), «Երկխոսությունը միջմշակութային համատեքստում» (2008 - 2010 թթ.):

Վերոհիշյալ աշխատանքների արդյունքները ամփոփված են ամբիոնի դասախոսների կողմից հեղինակած մի շարք մենագրություններում, ինչպես նաև պարբերաբար ներկայացվում են թե´ տեղական և թե´ միջազգային նշանակության տարբեր հրապարակումներում:

Ամբիոնը հրատարակում է գիտական աշխատանքների ժողովածու` «Օտար լեզուները բարձրագույն դպրոցում»: Գիտական աշխատությունների միջբուհական այս տարեգիրքն ընդգրկում է լեզվաբանության տարբեր խնդիրներին, ինչպես նաև օտար լեզվի դասավանդման մեթոդիկային և արտասահմանյան գրականությանը վերաբերող հոդվածներ:

Ամբիոնը շարունակում է աշխատել թեստային համակարգի հիմնադրույթների մշակման և կատարելագործման խնդիրների ուղղությամբ` նպատակ ունենալով մշակել լեզվի տիրապետման տարբեր մակարդակների պահանջներ:

Ամբիոնի դասախոսները մեծ աշխատանք են տանում ուսանողների դաստիարակության ուղղությամբ: Ամբիոնին կից գործում է English Club ակումբը, որը հնարավորություն է տալիս ուսանողներին հանդես գալ իրենց հուզող հարցերով, մասնակցել տարբեր հարցերի շուրջ քննարկումներին, հանդես գալ զեկուցումներով: Այս ամենը նպաստում է ուսանող-դասախոս հարաբերությունների ջերմացմանը և օգնում է արժեքային համակարգի ձևավորմանը:

Ամբիոնի դասախոսների աջակցությամբ ուսանողները մասնակցում են տարբեր ուսանողական գիտաժողովների և մրցույթների: Մասնավորապես նշենք, որ շուրջ տասը տարի շարունակ ԵՊՀ միջազգային հարաբերությունների, տնտեսագիտության և ժուռնալիստիկայի ֆակուլտետների ուսանողները գրավում են առաջին տեղը Անգլախոսների միության (ESU - English Speaking Union) մրցույթներում և արժանանում պատվոգրերի ու մրցանակների ՄԱԿ-ի հայաստանյան գրասենյակի կողմից կազմակերպված միջոցառումներում:

Ֆրանսիական բանասիրության ամբիոնը անցել է զարգացման կարճ, բայց արգասավոր ուղի` բանասիրության ֆակուլտետի ենթաբաժնից վերածվելով ԵՊՀ կարևորագույն ամբիոններից մեկը: Այն ստեղծվել է 2009-2010 ուսումնական տարում` անջատվելով ռոմանական բանասիրության ամբիոնից: Լինելով նորաստեղծ ամբիոն, բայց անցյալում ունենալով մեծ նվաճումներ, ֆրանսիական բանասիրության ամբիոնը շարունակում է իր ավանդական գործունեությունը` պատրաստելով որակյալ մասնագետներ, որոնք այսօր աշխատում են ՀՀ կառավարությունում, նախարարություններում, պետական և մասնավոր ձեռնարկություններում, կրթօջախներում:

Նորաստեղծ ֆրանսիական բանասիրության ամբիոնը ներկայումս գլխավորում է մանկավարժական գիտությունների թեկնածու, դոցենտ Զավեն Հարությունյանը:

Ամբիոնն ապահովված է կաբինետներով, գեղարվեստական և մասնագիտական հարուստ գրադարանով, որը մշտապես համալրվում է նորագույն մասնագիտական գրականությամբ և դասագրքերով Ֆրանսիայի դեսպանատան, ինչպես նաև այլ կազմակերպությունների հետ համագործակցության շնորհիվ:

Ֆրանսիական բանասիրության ամբիոնն ունի գիտական մեծ ներուժ, որի վկայությունն են մեր դասախոսների հեղինակած մենագրությունները, դասագրքերը, մեթոդական ձեռնարկներն ու բառարանները:

Հիշատակելի են Զ. Հարությունյանի «Լեզվի խոսքայնացումը և հոլովական իմաստները», Ս. Խաչատրյանի «Մարդու իրավունքները միջազգային փաստաթղթերում», Ա. Ղարիբյանի և Մ. Ջուլհակյանի կազմած «Ֆրանսերենի ընթերցանության ձեռնարկը» և «Ֆրանսիայի պատմության և երկրագիտության ձեռնարկը», Թ. Բլբուլյանի «Ֆրանսերեն լեզվի արտասանական-ուղղախոսական ուղեցույցը», Գ. Սարգսյանի «Թարգմանություն և թարգմանաբանություն ձեռնարկը», «Ֆրանսերենի դասագիրք»-ը և այլ աշխատություններ:
2009 թ. լույս է տեսել նախադեպը չունեցող «Ֆրանսերեն-հայերեն» մեծ բառարանը` Ա. Մուրադյանի ընդհանուր խմբագրությամբ:

Ֆրանսիական բանասիրության ամբիոնի գործունեության կարևորագույն ոլորտներից են նաև թարգմանությունն ու թարգմանագիտությունը: Ամբիոնի դասախոսների ուժերով հայերեն են թարգմանվել ֆրանսիական գեղարվեստական, ինչպես նաև լեզվաբանական գրականության բազմաթիվ դասական և ժամանակակից երկեր:

Ամբիոնն առաջնահերթ կերպով զբաղվում է մայր բուհում ֆրանսերենի դասավանդման մեթոդական և կազմակերպական խնդիրներով` առարկայական ուսումնական ծրագրերի վերանայում և վերախմբագրում, երիտասարդ դասախոսների մասնագիտական որակի բարձրացում: Ուսումնամեթոդական աշխատանքներ են ծավալվել նաև ԵՊՀ Իջևանի մասնաճյուղում:

Ներկայումս ամբիոնի 7 դասախոսներ և 5 հայցորդներ (Գյումրիից և Երևանից) աշխատում են ատենախոսական թեզերի վրա:

ԵՊՀ Ֆրանսիական բանասիրության ամբիոնը սերտ համագործակցում է Ֆրանսիայի Մոնպելիեի Պոլ Վալերիի անվան և Էքս-ան-Պրովանսի համալսարանների հետ:

Ամբիոնի նախաձեռնությամբ ԵՊՀ-ն անդամակցել է ֆրանկոֆոնիայի համալսարանկան միջազգային կազմակերպությանը, որը եվրոպական մակարդակի ուսումնամեթոդական և գիտահետազոտական լայն գործունեություն ծավալելու հնարավորություն է ընձեռում:

Ռոմանական բանասիրության ամբիոնը ստեղծվել է 1991 թվականին: Ի սկզբանե ամբիոնը ապահովում էր երեք օտար լեզուների դասավանդում` ֆրանսերեն, իսպաներեն և իտալերեն, իսկ ավելի ուշ` 2007 թվականից, մագիստրատուրայում դասավանդվում է նաև պորտուգալերեն: 2009 թվականից ի վեր ամբիոնն ապահովում է միայն ռոմանական երեք լեզուների (իսպաներեն, իտալերեն, պորտուգալերեն) դասավանդումը, ընդ որում իսպաներենն ու իտալերենը դասավանդվում են և' որպես հիմնական լեզու, և' որպես երկրորդ մասնագիտական լեզու:

Ամբիոնում դասավանդում են ինչպես երկարամյա մանկավարժական փորձ ունեցող մասնագետներ, այնպես էլ երիտասարդ հմուտ դասախոսներ: Օտար լեզուների դասավանդման մեջ ակնհայտ են լեզուների ուսուցման արդի մոտեցումները, հաջողությամբ զուգակցվում են դասավանդման հաղորդակցական և այլ նորագույն մեթոդները: Ամբիոնն իր գործունեությունը ծավալում է մի քանի հիմնական ուղղություններով` ուսումնական, ուսումնամեթոդական, գիտական և թարգմանական: Ամբիոնում իրականացվում են մի շարք հետազոտական աշխատանքներ, որոնք ներառում են գիտական հետաքրքրությունների լայն շրջանակ և առնչվում են ռոմանական բանասիրության տարբեր հիմնահարցերի` իմաստաբանություն, դարձվածաբանություն, գործաբանություն, թարգմանաբանություն և այլն:

Ամբիոնի դասախոսները հրատարակել են մի շարք ուսումնական ձեռնարկներ, դասագրքեր, բառարաններ և ուսումնաօժանդակ նյութեր: Ամբիոնի աշխատանքներին ակտիվորեն մասնակցում են նաև Իսպանիայից, Իտալիայից և Բրազիլիայից հրավիրված մասնագետներ, որոնք իրականացնում են գիտամանկավարժական լուրջ աշխատանք: Սերվանտեսի ինստիտուտի և Իսպանիայից ժամանած դասախոսների հետ համագործակցությամբ ամբիոնում կազմակերպվում են «Իսպաներենը որպես օտար լեզու» դիպլոմի որակավորման միջազգային քննություններ, իսկ Սիենայի համալսարանի հետ համագործակցությամբ` իտալերեն լեզվի որակավորման քննություն` ըստ լեզուների իմացության եվրոպական չափանիշների:

Ամբիոնի գործունեության կարևոր օղակներից է թարգմանության տեսական և գործնական խնդիրների քննությունը, ինչպես նաև իսպաներենից հայերեն և հայերենից իսպաներեն կատարած մի շարք թարգմանությունները: 2010 թվականից ի վեր ամբիոնը հրատարակում է «Ծաղիկ թարգմանությանց» մատենաշարը , որն ամփոփում է իսպաներենի և իտալերենի բաժինների ուսանողների թարգմանությունները՝ իսպաներենից, իտալերենից հայերեն և հակառակը:

Ռոմանական բանասիրության ամբիոնի մշտական ուշադրության կենտրոնում է կրթական ծրագրերի մշակման և կատարելագործման խնդիրը՝ հաշվի առնելով նաև արդի աշխատաշուկայի պահանջները: 2017-2018 ուսումնական տարում ամբիոնում մեկնարկել են «Միջմշակութային հաղորդակցություն (իսպաներեն)» և «Միջմշակութային հաղորդակցություն (իտալերեն)» մագիստրոսական կրթական ծրագրերը, իսկ 2018-2019 թթ.՝ «Անգլերեն լեզու, իսպաներեն լեզու և հաղորդակցություն», «Անգլերեն լեզու, իտալերեն լեզու և հաղորդակցություն» բակալավրի կրթական ծրագրերը՝ եվրոպական արդի չափանիշներին համապատասխան:

Մի շարք փոխանակման ծրագրերի շրջանակներում իսպանական բաժնի ուսանողները իսպաներեն լեզվի կատարելագործման տարբեր դասընթացներ են անցնում Մադրիդի, Ալմերիայի, Վալենսիայի, Կադիսի և այլ համալսարաններում: Ամբիոնի և Իսպանիայի տարբեր համալսարանների միջև սերտ գիտամանկավարժական համագործակցության շրջանակներում վերջին տարիներին ամբիոնի դասախոսների և ուսանողների համար ռոմանական բանասիրությանն առնչվող տարբեր դասախոսություններով հանդես են եկել այնպիսի հայտնի իսպանագետներ, ինչպիսիք են Մադրիդի Կոմպլուտենսե համալսարանի բանասիրական ֆակուլտետի դեկան Է. Ռամոն Լուխանը, հանրահայտ «Paremia» ամսագրի հիմնադիր Խ. Սևիլյա Մունյոսը, իսպանացի հայտնի գրականագետ Մ.Թ. Բարբադիյոն, Ալիկանտեի, Վալյադոլիդի, Գրանադայի, Սալամանկայի և այլ համալսարանների մի շարք դասախոսներ:

Ամբիոնն ունի իտալերենի և իսպաներենի ժամանակակից կաբինետներ, հարուստ մասնագիտական գրադարան և ապահովված է օտար լեզուների դասավանդման արդի տեխնիկական միջոցներով: Ամբիոնում մշտապես աշխատում է Իտալիայի ԱԳՆ-ից գործուղված դասախոս, որի դերն առանձնահատուկ կարևորվում է ուսանողների բանավոր խոսքի հմտությունների զարգացման մեջ: Զանազան ծրագրերի, ինչպես նաև Հայաստանում Իտալիայի դեսպանատան հետ սերտ համագործակցության շրջանակներում, ամեն տարի իտալական բաժնի ուսանողները և դասախոսները վերապատրաստման դասընթացներ են անցնում Իտալիայի տարբեր համալսարաններում:

ԵՊՀ գերմանական բանասիրության ամբիոնը կազմակերպում է գերմաներեն լեզվի ուսուցումը համալսարանի բոլոր հումանիտար և բնագիտական ֆակուլտետներում, ինչպես նաև պատրաստում է գերմանագետ մասնագետներ (բանասեր, մանկավարժ) ռոմանագերմանական բանասիրության ֆակուլտետում: Ուսուցումը կազմակերպվում է ինչպես բակալավրատում, այնպես էլ մագիստրատուրայում: Ամբիոնում աշխատում են թ՞ե երկարամյա փորձ ունեցող և թ՞ե սկսնակ դասախոսներ, որոնք համարյա բոլորը ստացել են բարձր որակավորում Գերմանիայի և Ավստրիայի տարբեր համալսարաններում: Ուսման ընթացքում գործադրվում են միջազգային ճանաչում գտած լեզուների ուսուցման առաջավոր մեթոդներ, իսկ տեսական գիտելիքները մատուցվում են ժամանակակից լեզվաբանական գիտության նվաճումների հաշվառումով: Առանձին ուշադրության է արժանանում «Գերմաներենը որպես 2-րդ մասնագիտական օտար լեզու» ուսուցումը ԵՊՀ ռոմանագերմանական բանասիրության ֆակուլտետում, որտեղ կիրառվում է դասավանդման յուրահատուկ մեթոդաբանություն:

Բնագիտական և հումանիտար ֆակուլտետներում գերմաներեն լեզվի ուսուցումը կազմակերպվում է այն նպատակադրմամբ, որ համապատասխան որակավորում ստացող ուսանողները կարողանան ազատ հաղորդակցվել և օգտվել գերմաներեն լեզվով գրականությունից:

Թ՞ե բակալավրատում և թ՞ե մագիստրատուրայում բարձր առաջադիմությամբ ուսանողները հնարավորություն են ստանում կատարելագործել իրենց լեզվական գիտելիքները Գերմանիայի և Ավստրիայի առաջավոր համալսարաններում, իսկ մագիստրատուրայի առանձին ուսանողներ` այնտեղ անցկացնելու իրենց նախադիպլոմային պրակտիկան:

Ամբիոնի դասախոսների ուժերով հրատարակվել և հրատարակվում են տարբեր բնույթի դասագրքեր, բառարաններ և ուսումնաօժանդակ նյութեր: Ամեն տարի Գերմանիայից և Ավստրիայից հրավիրվում են բարձրակարգ մասնագետներ, որոնք իրականացնում են ինչպես մանկավարժական, այնպես էլ գիտական աշխատանք:

Ամբիոնի դասախոսներն ակտիվորեն մասնակցում են տարբեր միջազգային և տեղական նշանակության գիտաժողովների ու սեմինարների և ունեն նկատելի ձեռքբերումներ:

«Թարգմանչական գործ» մասնագիտացումը ձեռնարկվեց 1992 թ. ռոմանագերմանական բանասիրության ֆակուլտետի (ներկայումս՝ Եվրոպական լեզուների և հաղորդակցության ֆակուլտետ) հիմնադրումից մեկ տարի անց:

Արդեն իսկ 1999թ. ֆակուլտետում ներմուծվեց «Թարգմանչական գործ» առանձին մասնագիտությունը, որտեղ 1-ին կուրսից սկսած պատրաստում էին ապագա թարգմանիչներ:
Ելնելով որակյալ թարգմանիչների ժամանակակից մեծ պահանջարկից` 2009թ.-ին ստեղծվեց թարգմանության տեսության և պրակտիկայի ամբիոնը:

Իր հիմնադրումից ի վեր` ավելի քան տաս տարի թարգմանչական բաժինն ուսումնական և գիտական բեղուն գործունեություն է ծավալում ֆակուլտետում` պատրաստելով ոչ միայն որակյալ թարգմանիչներ, այլ նաև հրատարակելով դասագրքեր, ուսումնական ձեռնարկներ, գեղարվեստական թարգմանություններ, մենագրություններ և հոդվածների ժողովածուներ:

Թարգմանության տեսության և պրակտիկայի ամբիոնում գործում է կրթական երկաստիճան համակարգ՝ բակալավրիատ և մագիստրատուրա:
Բակալավրիատում երկու տարի լեզվական խորը գիտելիքներ ստանալով՝ ամբիոնի ուսանողներն ունեն եզակի հնարավորություն 3-րդ կուրսից ընտրել նեղ մասնագիտացում՝ «Վարչագործարարական թարգմանություն» և «Զբոսաշրջային թարգմանություն» ուղղվածություններով, ինչը հնարավորություն է տալիս հետագայում շարունակել կրթությունը մագիստրատուրայում՝ թարգմանական ոլորտում մասնագիտական նեղ կրթություն ստանալով:

Ներկայումս ամբիոնում գործում է մագիստրոսական 3 կրթական ծրագիր.

Թարգմանչական գործ (անգլերեն լեզու)

Վարչագործարարական թարգմանություն

Զբոսաշրջային թարգմանություն (անգլերեն-հայերեն)

Հարկ է նշել, որ թարգմանության տեսության և պրակտիկայի ամբիոնն առաջինն էր, ով ձեռնարկեց և իրագործեց միջգիտակարգային կրթական 2 մագիստրոսական ծրագիր, որոնք տարբերվում են իրենց դասավանդվող առարկաների բազմա¬զանութ¬յամբ և մասնագիտական խորությամբ, ինչպես նաև առավել ընդգրկուն ուսում¬նական ծրագրերով, որոնցում ներառված են ոչ միայն լեզվական և թարգմանական հմտություններ զարգացնող մասնագիտական առարկաներ, այլև մասնագիտական ոլորտի իմացության համար կարևոր պատմամշակութային, իրավական և տնտեսագիտական գիտելիքներ փոխանցող դասընթացներ, ինչպիսիք են՝ հայ եկեղեցու պատմություն, ՀՀ զբոսաշրջային արդյունաբերություն, միջազգային զբոսաշրջություն, զբոսաշրջային ոլորտի մենեջմենթ, մշակութաբանություն, զբոսաշրջիկների իրավական պաշտպանություն, նոտարական և դատաբժշկական թարգմանություն, իրավատնտեսական, քաղաքական և այլն:

Վերոնշյալ մագիստրոսական կրթական ծրագրերն եզակի են իրենց՝

միջգիտակարգային բնույթով,

դասավանդվող առարկաների բազմազանությամբ,

լեզվական և թարգմանական հմտությունները զարգացնող մասնագիտական առարկաներով,

տարբեր օտար լեզուների (անգերեն, ֆրանսերեն, իսպաներեն և ռուսերեն) համադրությամբ թարգմանական հմտությունները զարգացնող դասընթացներով,

հայաստանյան և միջազգային տարբեր կազմակերպություններում անցկացվող արտադրական պրակտիկայով:

Ամբիոնի առաջնային նպատակներն են՝

Ուսանողին ապահովել լեզվական խորը գիտելիքով,

Զարգացնել ուսանողի գրավոր և բանավոր թարգմանության գործնական հմտությունները,

Ծանոթացնել ուսանողին ոլորտային թարգմանության առանձնահատկություններին (իրավաբանական, տնտեսագիտական, նոտարական, բժշկական, զբոսաշրջային և այլն),

Գործել հայաստանյան աշխատաշուկայի արդի պահանջներին համապատասխան:

Այսօր վստահաբար կարելի է ասել, որ հայ թարգմանչական դպրոցի հարուստ ավանդույթները շարունակվում են, և ԵՊՀ թարգմանության տեսության և պրակտիկայի ամբիոնն անում է ամեն ինչ դրանց պահպանման համար: Ամբիոնը ներառում է նաև ԵՊՀ Շեքսպիրագիտության կենտրոնը, որտեղ բեղուն գործունեություն են ծավալում թարգմանության տեսության և պրակտիկայի ամբիոնի դասախոսները (հրատարակվում են Շեքսպիրին նվիրված տարբեր ուսումնասիրություններ, անցկացվում թարգմանական մրցույթներ, կազմակերպվում գիտաժողովներ):

Արտասահմանյան գրականության պատմությունը Երևանի համալսարանի հիմնադրման օրից մտել է պատմալեզվագրական ֆակուլտետի ուսանողների համար հատկացվող դասընթացների շարքը: 20-ական թվականներից այդ դասընթացները կարդացել են այնպիսի ականավոր գրականագետ-բանասերներ, ինչպես Սիմեոն Հակոբյանը, Սարգիս Մանուկյանը, նշանավոր գրող, եվրոպական լեզուների և մշակույթի հիանալի գիտակ Զապել Եսայանը: Մի փոքր ավելի ուշ սկսվում է գրականագիտության տեսական հիմունքների դասավանդումը, որը վարում էր հայտնի գրականագետ-քննադատ Ցոլակ Խանզադյանը:

1929 թվականին Հայաստանում համալսարանական ուսուցման զարգացման պահանջներին համապատասխան ստեղծվում են գրականության առանձին ամբիոններ, այդ թվում և արտասահմանյան գրականության ամբիոն: Տասը տարի ամբիոնը ղեկավարում էր պրոֆ. Սիմոն Հակոբյանը: Այդ տարիներին լույս ընծայվեցին մի շարք դասագրքեր` «Եվրոպական գրականության գլխավոր էջերը», Ա. Լունաչարսկու, Պ. Կազանի, Ֆ. Շիլլերի հայտնի ձեռնարկները, որոնք թարգմանվել և հրատարակվել են հայերեն: 30-ական թվականներից ամբիոնում դասավանդում էին Լենինգրադի արվեստագիտական ակադեմիայի ասպիրանտուրան ավարտած երիտասարդ գիտնականներ Հովհ. Մամիկոնյանը և Ս. Սողոմոնյանը, որոնք հետագայում գլխավորում են արտասահմանյան գրականության ամբիոնը (Հ. Մամիկոնյանը` 1957 - 1970, Ս. Սողոմոնյանը` 1970 - 1978 թթ.): Պետք է հիշատակել Հ. Մամիկոնյանի «Արտասահմանյան գրականության պատմություն. Վերածնության շրջան» դասագիրքը, Ս. Սողոմոնյանի «Եվրոպական գրականության ուրվագծեր», «Եվրոպական ռեալիզմի պատմությունից» ուսումնասիրությունները:

1956 թ. գրականության տեսության առարկաները անջատվում են արտասահմանյան գրականության ամբիոնից և տրվում այլ ամբիոնների:

1982 թ. արտասահմանյան գրականության և գրականության տեսության ամբիոնները համախմբվում են մեկ միասնական ամբիոնի մեջ, որը ղեկավարում էր ակադ. Էդ. Ջրբաշյանը, իսկ 1986 թ. հունվարից մինչև 2007 թ. մայիսը` բանասիրական գիտությունների դոկտոր, պրոֆեսոր Հ. Էդոյանը:

2007 թ. սեպտեմբերից արտասահմանյան գրականության ամբիոնը առանձնանալով Հայ բանասիրության ֆակուլտետի գրականության տեսության և գրա-քննադատության ամբիոնից շարունակում էր տպագրել «Համատեքստ» գիտական ամսագիրը (որը տպագրվում էր դեռևս 2002 թվականից) և ցանկություն ունենալով վերականգնել բաց թողնված ժամանակահատվածը, ամբիոնը նպատակադրված է վերսկսելու «Համատեքստ» գիտական ամսագրի վերահրատարակությունը 2013 թվականի վերջին հրատարակությունից հետո:

Ամբիոնը համատեղ աշխատանքներ է նախաձեռում դեսպանատների և միջազգային կառույցների հետ` կրթական բազմաթիվ ծրագրերի իրականացման համար: 2009- 2012 թ.թ. ամբիոնը համագործակցել է Իրանի Իսլամական Հանրա-պետության ասպիրանտների հետ, որոնք հաջողությամբ պաշտպանել են թեկնածուական ատենախոսություն «Արտասահմանյան գրականություն» մասնագիտությամբ:

2009-2020 թվականներին ամբիոնը պաշտոնավարել է բան. գիտ. դոկտոր Արա Հրաչիկի Առաքելյանը: Այդ ընթացքում արտասահմանյան գրականության ամբիոնը կազմակերպել է միջազգային գիտաժողովներ, որոնցից է «Ֆրիդրիխ Նիցշեն մշակույթի համատեքստում» խորագրով (2015): 2016-ին Ֆրանսիայից ժամանած դասախոսական կազմի հետ համատեղ կազմակերպվել է ֆրանսիական էքզիստենցիալիստների ստեղծագործական գործունեությանը նվիրված շնորհանդես, ընդլայնված կազմով ամբիոնը մասնակցել է Ամերիկյան համալսարանում կազմակերպված շեքսպիրյան միջազգային գիտաժողովին:

Ամբիոնի պրոֆեսորներ Հենրիկ Էդոյանը, Արա Առաքելյանը, դոցենտներ Սերգեյ Ստեփանյանը, Վահե Արսենյանը, Անուշ Սեդրակյանը բնագրերից թարգմանություններ են պատրաստել և տպագրել ներառելով նաև գրական-փիլիսոփայական երկեր, որոնց թվում՝ Հին Արևելքի պոեզիան, Ֆրանց Կաֆկայի, Դեն Բրաունի, Մարգարիտ Միտչելի, Վըրջինիա Վուլֆի, Դ. Հ. Լորենսի, Դիլըն Թո¬մասի, Ուիլյամ Բլեյքի, Խալեդ Հոսեյնիի, 20-րդ դարի ֆրանսիական բանաստեղծների ստեղծագործությունները: Ուշագրավ է պրոֆ. Ա. Առաքելյանի՝ վերջերս լույս ընծայած ««Նիբելունգների երգից» մինչև «Ուլունքախաղ»» մենագրությունը, որը ներառում է գերմանական գրականության սկզբնավորումից մինչև մեր օրերն ընկած ժամանակահատվածը: Սկսած 2015-ից դոց. Ա. Սեդրակյանը հեղինակում է Boon-TV «Արտասահ-մանյան գրականության պատմություն» կրթական-մասնագիտական դասախոսությունների ինտերնետային շարքը: Հետաքրքիր են նաև նրա «Քաղաքականությունը և գրականությունը» դասախոսությունները՝ «Ամենազորը» խորագրով, տեղադրված 1in.am Armenian News & Analyses, zhamanakyerevan@gmail.com, youtube.com ինտերնետային կայքերում:

ԵՊՀ 100-ամյա հոբելյանի առթիվ պրոֆեսորներ Հենրիկ Էդոյանը, Արա Առա-քելյանը և դոցենտ Անուշ Սեդրակյանն արժանացել են հոբելյանական պատվոգրերի:

2007թ. մինչ օրս ամբիոնում պաշտպանվել են 2 դոկտորական և ավելի քան 22 թեկնածուական ատենախոսություններ «Արտասահմանյան գրականություն» մասնագիտությամբ:

2020 թ. սեպտեմբերից ամբիոնը պաշտոնավարում է վաստակաշատ դասախոս, դոցենտ, բան. գիտ. թեկնածու Անուշ Ռոստոմի Սեդրակյանը:

Ամբիոնի գիտական աշխատանքը զարգանում է հետևյալ հիմնական ուղղություններով.
ա/ անգլո-ամերիկյան գրականության հիմնախնդիրները /Վերածննդից մինչև 21-րդ դար/:Մոդեռնիզմի գեղագիտական նորմերը և դրանց կիրառումը արվեստի տրաբեր բնագավառներում
բ/ֆրանսիական գրականության հիմնախնդիրները /Վերածննդից մինչև 21-րդ դար/.
գ/իսպանական և լատինամերիկյան գրականությունների հիմնախնդիրները /Վերա-ծննդից մինչև 21-րդ դար/.Մոգական ռեալիզմի դրսևորումները լատինամերիկյան գրականության մեջ
դ/գերմանական գրականության հիմնախնդիրները /Վերածննդից մինչև 21-րդ դար/.
ե/ իտալական գրականության հիմնախնդիրները /Վերածննդից մինչև 21-րդ դար/.
զ/ համեմատական գրականագիտություն
է/ գրականության հասարակական-քաղաքական և հոգեբանական մեկնությունները 16-21-րդ դարի գրականության մեջ
ը/ արևմտաեվրոպական գրական-գեղագիտական ուսմունքները
թ/17-19-րդ դ.դ. արևմտաեվրոպական գրական ուղղությունները
ժ/ 20-րդ դարի արևմտաեվրոպական գրական ուղղությունները

«Միջմշակութային հաղորդակցության անգլերենի» ամբիոնը (ամբիոնի վարիչ՝ բ.գ.դ., պրոֆեսոր Շուշանիկ Պարոնյան) գործում է 2012թ. սեպտեմբերից: Հայաստանի և աշխարհի տարբեր երկրների միջև մշտապես զարգացող տնտեսական, միջազգային, կրթական, մշակութային կապերի շնորհիվ այսօր միջմշակութային հաղորդակցության ոլորտի լեզվաբանի մասնագիտությունը լայն պահանջարկ ունեցող մասնագիտություն է:

Ամբիոնի նպատակն է պատրաստել անգլերենի բարձրակարգ մասնագետներ, որոնք կկարողանան արդյունավետ հաղորդակցվել տարբեր լեզվամշակույթների ներկայացուցիչների հետ` կիրառելով լեզուների հարմարակման մեխանիզմը: Ուսուցումը տարվում է անգլերեն գրավոր և բանավոր խոսքի զարգացման, ինչպես նաև համացանցային գրագրության միջոցով (գովազդային և կոնտենտ տեղեկատվություն) հաղորդակցական հմտությունները կատարելագործելու ուղղություններով։

Ներկայումս ամբիոնում կատարվում է լայնածավալ ուսումնամեթոդական և գիտահետազոտական աշխատանք` ուղղված լեզվի և մշակույթի, ճանաչողական լեզվաբանության, միջմշակութային գործաբանության և գործարար հաղորդակցության տարբեր բնագավառներին առնչվող տեսական և գործնական խնդիրների լուծմանը:

Ամբիոնում գործում է երկու մագիստրոսական ծրագիր՝ <<Միջմշակութային հաղորդակցություն՝ անգլերեն>> և <<Միջազգային գործարար հաղորդակցություն>>։ Դրանց նպատակն է պատրաստել միջմշակութային հաղորդակցության նրբություններին քաջատեղյակ անգլերենի մասնագետներ, ովքեր տեղյակ կլինեն գովազդային տեղեկատվության, գործարար և միջմշակութային հաղորդակցության, թարգմանության, մարքեթինգի և PR հիմնադրույթներին և կկարողանան մասնագիտական գործունեություն ծավալել մեդիա, գովազդի, տուրիզմի, տեղեկատվական տեխնոլոգիաների ոլորտներում, ինչպես նաև աշխատանքի կազմակերպման և կառավարման ոլորտներում։

Միջմշակութային հաղորդակցության անգլերենի ամբիոնի կազմում ընդգրկված են անգլերենի առաջատար մասնագետներ, լեզվաբաններ՝ բանասիրական գիտությունների դոկտոր պրոֆեսորներ բանասիրական գիտությունների թեկնածու դոցենտներ, երիտասարդ դասախոսներ, որոնցից շատերը զբաղվում են գիտական աշխատանքով և պաշտպանության են պատրաստում թեկնածուական ատենախոսություններ բանասիրության տարբեր գիտակարգերի ոլորտում:

«Բրիտանական գրականության և լեզվամշակույթի ուսումնասիրության լաբորատորիա (Մաս առաջին` Շոտլանդական գրականության և լեզվամշակույթի ուսումնասիրություն)» ծրագիրը (գիտական ղեկավար՝ բ.գ.դ. Մ.Սարգսյան) մեկնարկել է 2017 թվականին, ԵՊՀ ռ/գ բանասիրության ֆակուլտետի անգլիական բանասիրության ամբիոնի բազայի վրա:

Ծրագրի շրջանակներում նպատակ է դրված մեկնարկելու բրիտանական գրականության և լեզվամշակույթի համալիր ուսումնասիրությունների շարք` մասնավորապես ուշադրության կենտրոնում պահելով բրիտանական ուսումնասիրությունների «չորս ազգ» մոդելը: Այս մոտեցումը մեծապես կնպաստի ինչպես բուն անգլիական գրականության և լեզվամշակույթի առավել լայն ըմբռնմանը, այնպես էլ թույլ կտա ուսումնասիրելու բրիտանական լեզվամշակույթն ու գրականությունը իր ողջ բազմազանությամբ: Ծրագրի առաջին փուլը (Scottish Studies) ուղղված է շոտլանդական լեզվամշակույթի` որպես բրիտանական մշակույթի թերևս առավել ընդգրկուն և ժամանակակից Եվրոպայի ամենադինամիկ մշակույթներից մեկի և գրականության` որպես մարդու բարոյահոգեբանական դրսևորումների և ժամանակակից մարդուն հուզող խնդիրների վերարտադրման միջոցի ուսումնասիրություններին: Ծրագրի շրջանակներում նախատեսվում է համագործակցային կապերի հաստատում Շոտլանդիայի առաջատար բուհերի համապատասխան ամբիոնների և կենտրոնների հետ և համատեղ միջոցառումների իրականացում: