Երևանի պետական համալսարանը, կարևորելով հայ-ֆրանսիական բարեկամական հարաբերությունները, ֆրանսիախոս ազգերի միջև կապն ու համագործակցությունը, Ֆրանկոֆոնիայի շրջանակում ամեն տարի կազմակերպում է տարաբնույթ միջոցառումներ: Դրանց նպատակն է խթանել ֆրանսերենի, ֆրանսիական մշակույթի և Ֆրանկոֆոնիայի գաղափարների տարածումը:

ԵՊՀ Շառլ Ազնավուրի անվան մշակույթի կենտրոնի տնօրեն Կարինե Դավթյանն ընդգծեց, որ կենտրոնի երգչախումբը և «YSU Band»-ը Ֆրանսիական երգի փառատոնի ժամանակ կատարել են մեծն շանսոնիեի հայտնի երգերը. փառատոնի համար կազմվել էր հատուկ երգացանկ:

«ԵՊՀ մշակույթի կենտրոնի՝ Շառլ Ազնավուրի անունը կրելը մեծ պատասխանատվություն է, որը պարտավորեցնում է ավելի բարձր մակարդակով գործելու և նրա անվանը արժանի լինելու»,- շեշտեց Կ. Դավթյանը:

Նշենք, որ Շ. Ազնավուրի անվան մշակույթի կենտրոնը նախորդ տարիներին երգի փառատոնը կազմակերպել է ԵՊՀ եվրոպական լեզուների և հաղորդակցության ֆակուլտետի ֆրանսիական բանասիրության ամբիոնի հետ համագործակցությամբ: Հայաստանի՝ Ֆրանկոֆոնիայի լիիրավ անդամ դառնալու առաջին իսկ տարվանից կազմակերպված միջոցառումները վարակիչ են եղել կրթական այլ հաստատությունների համար Ֆրանկոֆոնիայի շրջանակում բազմաթիվ միջոցառումներ անցկացնելու տեսանկյունից:

Ֆրանսիական երգի 14-րդ փառատոնին ներկա էին Երևանի պետական համալսարանի ռեկտորատի, պրոֆեսորադասախոսական անձնակազմի ներկայացուցիչներ, տարբեր ֆակուլտետների ուսանողներ և մշակույթի ոլորտի այլ ներկայացուցիչներ։