Համագումարի հանդիսավոր բացումը հոկտեմբերի 11-ին տեղի ունեցավ ԵՊՀ գիտխորհրդի նիստերի դահլիճում: Մասնակիցներին նախ ողջունեց Եվրասիական բուհերի արհեստակցական կազմակերպությունների ասոցիացիայի նախագահ, Մոսկվայի Լոմոնոսովի անվան պետական համալսարանի պրոռեկտոր Իգոր Կոտլոբովսկին, ով այնուհետև խոսքը փոխանցեց ԵՊՀ ռեկտորին: Մայր բուհի պատմությունը, կառուցվածքը, գիտակրթական ոլորտներում ունեցած դերն ու միջազգային կապերը ներկայացնելուց հետո Արամ Սիմոնյանն անդրադարձավ Արհեստակցական կազմակերպությանն ու դրա նշանակությանը համալսարանականների համար:
«ԵՊՀ արհմիությունը հիմնադրվել է 1947 թ.-ին: Խորհրդային Միության փլուզումից հետո մեր համալսարանն իր արհմիությունը պահպանեց, և կարծում եմ՝ այսօր այդ կառույցն ավելի ուժեղ է, քան խորհրդային տարիներին: ԵՊՀ 2016-2020 թթ. զարգացման ռազմավարական ծրագրի մեջ կարևոր ուղղություններ են սոցիալական ծրագրերը՝ ուղղված և՛ դասախոսներին, և՛ ուսանողներին, որոնք մենք իրականացնում ենք Արհեստակցական կազմակերպության օգնությամբ»,- նշեց պարոն Սիմոնյանը և եվրասիական բուհական համակարգում արհմիությունների զարգացման գործում ունեցած ավանդի համար Իգոր Կոտլոբովսկուն հանձնեց ԵՊՀ ոսկե մեդալ:
Ողջույնի խոսք ասաց նաև Հայաստանի բուհերի արհեստակցական կազմակերպությունների ճյուղային հանրապետական միության նախագահ Գառնիկ Վաղարշակյանը:
Համագումարի ընթացքում տարբեր երկրների բուհերի արհմիությունների ներկայացուցիչները հանդես եկան զեկուցումներով՝ ներկայացնելով իրենց փորձը, բարձրացնելով ոլորտին հատուկ խնդիրներ ու փորձելով համատեղ լուծումներ գտնել:
«ԵՊՀ-ում բարի ավանդույթ է, որ աշխատակիցների խնդիրները քննարկվում են Արհեստակցական կազմակերպության և գործատուի հետ ու լուծում ստանում, բնականաբար՝ օրենքի սահմաններում: Մեր խնդիրն է ստեղծել այնպիսի պայմաններ, որ խնդիրներ չծագեն: Դրան նպաստում է նաև կոլեկտիվ պայմանագիրը»,- իր զեկույցում փաստեց ԵՊՀ արհեստակցական կազմակերպության նախագահ Արմեն Ավետիսյանը և հավելեց, որ ԵՊՀ-ն Հայաստանում առաջինն էր, որտեղ 2007 թ.-ին կոլեկտիվ պայմանագիր կնքվեց գործատուի և արհմիության միջև:
Համագումարի ընթացքում նաև նշվեց, որ ԵՊՀ-ն պատրաստվում է իր աշխատակիցների համար առողջապահական ապահովագրության ծրագիր ներդնել իր միջոցների հաշվին: Գործընթացն արդեն սկսվել է և ավելի տեսանելի կդառնա եկող տարվա սկզբին:
Հավելենք նաև, որ համագումարի ավարտին մասնակից երկրների ներկայացուցիչների մասնակցությամբ ստորագրվել է հռչակագիր, որում զետեղված են բարձրացված բոլոր խնդիրներն ու դրանց լուծման ուղիները:
